Maður skynjaði svo áberandi ástríðuna í liði ÍR í dag, þeir eru komnir í deildina til að láta að sér kveða. Það er orðinn ofnotaður frasi í þessari deild að segja að þeir hafi viljað þetta meira en þannig var það bara í dag. Svo auðvitað skiptir máli að fá góða stuðningsmannasveit með úr Breiðholtinu sem hjálpaði ÍR yfir þröskuldinn. Auk þess fannst mér allskonar klaufaskapur til baka oft á tíðum hjá Keflavíkurliðinu og á tímabili langaði mig til að finna klaufabárðalagið og spila það yfir leiknum.

Ég held að margir ÍR-ingar hafi fengið hland fyrir hjartað í uppbótartíma þegar gamli ÍR-ingurinn Sindri Snær Magnússon komst í dauðafæri í teignum og þrumaði að marki ÍR. Skotið fór í stöngina nær og þaðan eftir marklínunni og afturfyrir hinum megin. Munaði engu að Keflavík hefði jafnað metin.

Fyrir lið eins og ÍR sem búist er við að muni berjast fyrir lífi sínu í deildinni þá munu þrjú stig gegn toppliðinu telja mikið þegar talið verður upp úr hattinum í haust. Nema þeir taki bara upp á því að nýta meðbyrinn til að verða spútnik lið sumarsins. Það skyldi þó aldrei verða? Keflavík þar ekki að hafa áhyggjur, þeir eru með hörku mannskap og hljóta að keyra sig í gang í næsta leik. Þetta var annar leikur liðsins á gervigrasinu í Njarðvík í upphafi móts en næsti heimaleikur fer fram á grasinu þeirra í Keflavík, þar líður þeim best.

Ef Keflavík ætlar að vera topplið í deildinni í sumar þá þarf að skora mörk. Mér fannst eiga að koma meira út úr Degi Inga Valssyni í framlínunni. Hann er virkilega góður leikmaður þegar hann er á deginum sínum en mér fannst skorta verulega á ógn frá honum í dag.

Frábær dómgæsla hjá Helga Mikael. Hann var með sýnikennslu hvernig á að dæma fótboltaleiki. Það hefur verið mikið gagnrýnt í sumar hvernig dómarar hafa dreift gulum spjöldum eins og karamellum á fótboltaleikjum en það var allt annað í gangi hjá Helga Mikael í kvöld. Hann stýrði spennustiginu hjá leikmönnum með tiltölum og jafnvel alvarlegu tiltali. Spjöldin þrjú sem hann lyfti voru fyllilega verðskulduð og réttur dómur. Til að einfalda honum verkið var framkoma þjálfara og sér í lagi annarra starfsmanna á hliðarlínunni til mikillar fyrirmyndar, ekkert óþarfa öskur og tuð í algjöru lágmarki.