Lestu um leikinn: KA 3 -  1 Vestri

„Við töluðum um að gera áfram það sem við vorum að gera vel en að við þyrftum að bæta viss atriði og þá myndi þetta koma. Ég er gríðarlega ánægður að liðið hafi haldið áfram að trúa og gert sitt. Við skorum þrjú mörk, eftir að við byrjuðum að skora fannst mér þetta aldrei spurning."

„Það var frábært að koma til baka. Við erum búnir að fá ansi mörg högg í sumar, á mörgum vígstöðvum, bara hrós á strákana fyrir karakterinn."

KA hafði fyrir leikinn einungis unnið einn leik á tímabilinu. Það var sigurinn gegn ÍR í 32-liða úrslitunum.

„Það er svolítið góð tilfinning (að vinna aftur leik). Við því miður höfum átt erfitt með það, frammistaðan hefur oft verið góð en sigrarnir hafa látið bíða eftir sér. Svona bara léttir á öllum. Við njótum í dag og svo förum við að hugsa um Fylki. Þó að maður vinni fótboltaleiki þá þýðir það ekki að það sé allt frábært, við þurfum ennþá að bæta suma hluti sem ég veit að við eigum að gera gert betur. Það er oft þægilegra eftir sigurleiki að líta aðeins í eigin barm hvað hægt sé að gera betur heldur en þegar maður tapar leikjum."

Frábært hversu fljótt Birgir komst inn í hlutina
KA spilar með þrjá varnarmenn aftast. Haddi segir að það hjálpi liðinu í pressunni. Birgir Baldvinsson var í vinstri vængbakverði í kvöld og var maður leiksins.

„Hann er frábær í þessari stöðu og mér finnst þetta kerfi henta liðinu betur eins og staðan er núna."

„Biggi er frábær leikmaður, mikill kraftur, mikill karakter og góður í návígum. Það er frábært hversu fljótt hann er kominn inn í þetta. Hann var að koma frá Bandaríkjunum. Í fyrra þurfti hann smá tíma en núna vissi hann hvað hann væri að fara út í. Ég held það hafi hjálpað honum að hafa spilað aðeins úti."

Tómatsósuáhrifin
KA skoraði tvö mörk eftir hornspyrnur og eitt beint úr aukaspyrnu.

„Það er sætt og við eigum að geta skorað fleiri mörk eftir föst leikatriði. Við erum með stórt og sterkt lið og frábæra spyrnumenn. Stundum eru þetta bara tómatsósuáhrifin: loksins þegar þetta kemur þá kemur þetta á fullu."

Bræðraskipting
Í seinni háflleiknum var bræðraskipting: Bjarni Aðalsteinsson fór af velli fyrir yngri bróður sinn Hákon Atla.

„Ég var ekki búinn að spá í því, það er bara æðislegt. Hákon er búinn að standa sig vel. Það er stundum þannig þegar þú ert hafsent að þú kemur ekki jafnoft inn á og aðrir. Ég veit alveg hvað hann getur, hann er frábær leikmaður, með rosalega góðan leikskilning og er góður á boltann. Frábært að geta leyft honum að spila," sagði Haddi.

Þór núna eða í úrslitaleiknum?
Þjálfarinn var spurður hvort að Þór á heimavelli væri draumadrátturinn.

„Já, er það ekki eina liðið sem er komið áfram? Það væri gaman að fá þá, eða bara í úrslitaleiknum, fá alvöru stemningu."

Í viðtalinu ræðir hann einnig um Viðar Örn Kjartansson, leikmennina utan hóps og aukaspyrnumarkið hans Bjarna. Viðtalið má sjá í heild sinni í spilaranum efst.