Anna María Baldursdóttir, fyrirliði Stjörnunnar, var borin meidd af leikvelli eftir að hún lenti í samstuði við Jordyn Rhodes, leikmann Tindastóls á 83. mínútu, í 0-2 tapi Stjörnunnar á heimavelli gegn Tindastól í Bestu-deild kvenna í kvöld.
Anna missti meðvitund um stund og fór blóðug á sjúkrabörum af leikvelli og beint upp á spítala. Kristján vildi sjá önnur viðbrögð frá dómarateymi leiksins.
„Það var ráðist á hana inn í okkar vítateig og það var ekki einu sinni gefin áminning né aukaspyrna. Það sama gerðist nokkru áður þegar ráðist var á markvörðinn okkar og ekki var gefin áminning þá heldur. Ég veit það ekki nákvæmlega [með stöðuna á Önnu] en það voru einhverjir áverkar á andliti hennar,“ svaraði Kristján, aðspurður hver staðan á Önnu væri.
Kristján telur úrslit leiksins ekki ósanngjörn en hefðu getað fallið með Stjörnukonum ef þær hefðu farið betur með færanýtingu sína.
„Í jöfnum leik síðustu helgi þá vinnum við þegar við skorum sigurmarkið undir lokin. Hérna tókst ekki að setja þetta mark sem okkur fannst við eiga inni. Jafn leikur samt og kaflar þarna sem við áttum að nýta betur,” sagði Kristján áður en hann bætir við.
“Það hefði verið gott að skora fyrsta markið þar sem við fáum fyrsta opna færið, skalli í stöng. Síðan kemur færi hjá andstæðingnum og þar fer boltinn inn í markið. Það sem vantar upp á er að við þurfum að vera betri en andstæðingurinn inn í teig, bæði þegar við fáum færin og þegar við þurfum að verjast,” sagði Kristján Guðmundsson, þjálfari Stjörnunnar. Viðtalið við Kristján í heild má sjá í spilaranum hér að ofan.
