„Það var bara mjög gott. Mikill léttir,'' sagði Hallgrímur Jónasson, þjálfari KA, þegar hann var spurður út í stórglæsilegt sigurmark Daníels Hafsteinssonar á Greifavellinum í dag. KA vann dramatískan 2-1 sigur á Lengjudeildarliði ÍR í 32-liða úrslitum Mjólkurbikarsins og verður því í pottinum á morgun.
„Fengum mark á okkur í lokin, eins og í síðasta leik og sýndum bara jákvæðni og trú að halda áfram og ætli þetta sé ekki mark ársins hjá Danna, þannig að það var bara mjög gott.''
Lestu um leikinn: KA 2 - 1 ÍR
KA hafa nú fengið á sig mörk í uppbótartíma í síðustu tveimur leikjum. Fara KA í einhvers konar andlega læsingu í lok leikja?
„Já, það getur bara vel verið. Undirbúningstímabilið gekk rosalega vel og gekk vel í fyrra, en svo lendum við í því núna að við fáum á okkur mark á leiðinlegum tímapunktum og svona erfið mörk, sem að áttu kannski ekki að vera lögleg. Það er bara eðlilegt að það setjist aðeins í og við fáum aftur á okkur mark eftir 90. mínútu í dag - ÍR-ingar gerðu bara vel.''
Hann bætti svo við: „En að koma til baka og klára leikinn er jákvætt og það gefur okkur eitthvað. Oft bara fara nokkur kíló af öxlunum þegar maður klárar svona leiki.''
Umræðan í kringum KA hefur verið neikvæð og þung. Hvernig líst Hallgrími á prógrammið framundan? Þar bíða Víkingur, KR og Valur í næstu þremur leikjum.
„Búið að vera smá þungt og okkur finnst við ekki vera með þau stig sem að við eigum skilið miðað við frammistöðurnar. Frammistaðan í síðasta leik á móti Vestra var ekki nógu góð og við töpum í lokin, en það er bara þannig. Við erum búnir að ganga í gegnum ansi mikið og skemmtilegt á síðustu tveimur árum og núna kemur alvöru verkefni - við byrjum aðeins þungt og þá bara reynir á að við stöndum saman og gerum þetta saman. Við stöndum saman sem lið; fólkið í bænum, þjálfararnir og strákarnir,'' sagði Hallgrímur.
Viðtalið má sjá í heild sinni í spilaranum hér að ofan.
